Аҥылу корылалып турган jерлер депутаттардыҥ аjарузында
Эл Курултайдыҥ депутаттары Оҥдой аймакта аҥылу корылалып турган jерлердиҥ тап-эрик тӧзӧлгӧлӧрин быжулаарына учурлалган jуунда турушкандар.
«Ӱч-Эҥмек» – республикада аҥылу корылалып турган jерлердиҥ дирекциязына кирип турган парктардыҥ бирӱзи. Депутаттар мында jаҥыс ла дирекцияныҥ, парктыҥ ишчилериле эмес, а айландыра турган jурттардыҥ эл-jоныла туштажып, аҥылу корылалып турган jерде корулаар иштер, экскурсиялар ӧткӱрери ле албатыла колбулар канайда ӧдӱп турганын шиҥдеген.
Экология ла ар-бӱткенди тузаланары аайынча комитеттиҥ председатели Владислав Рябченконыҥ jетиргениле, букӧдӱрилген сурактардыҥ аайына чыҥдый чыгарга парламенттиҥ профильный комитеттери ле jаба jасактыҥ jаҥы ӱлекери белетелер. Темдектезе, дирекция корулаар иштерин тыҥытсын деп административный тап-эрик бузыштар аайынча jасакка кубулталар кийдирилер.
Аграр политика аайынча комитеттиҥ председатели Рустам Байдалаковтыҥ шӱӱлтезиле, аҥылу корылалып турган jерлердиҥ иштеер аайын ла тап-эрик тӧзӧлгӧлӧрин бӱгӱнги кӱнниҥ некелтелерине келиштире кубултканы парктар ла албаты-jон ортодо jарамыкту айалга ачар.
Дирекция jерлеринде санитар аруташтар ӧткӱрерге ле сӱрее-чӧпти чыгарарга акча-манатла jеткилделер учурлу, парктардыҥ jӧӧжӧ-техникалык базазын тыҥыдар керек.
Бу сурактар республикан бюджетти шӱӱжеринде кӧрӱлер. Туризм, аргачылык, спорт ло jашӧскӱрим аайынча комитеттиҥ председатели Сергей Тимошенский «аҥылу корылалып турган jерлерде «экологиялы корыктар» тӧзӧп, олордо экскурсиялар ӧткӱрери депутаттардыҥ шиҥжӱзинде турар», – деп угусты.
