Jаан учурлу сурактар шӱӱжилген jуун
Эл Курултайдыҥ баштапкы вице-спикери Татьяна Гигель Башкаруныҥ jуунында турушкан. Бюджет jӧптӧгӧн jаан учурлу jуунды республиканыҥ башчызы Андрей Турчак ӧткӱрген. Оныҥ jетиргениле, быjылгы jылда бюджеттиҥ кирелтези 2,2 млрд. салковойго кӧптӧгӧн.
Бу акчаныҥ 1 млрд. салковойы премьер-министр Михаил Мишустинниҥ кӧнӱ jакылтазыла федерал бюджеттеҥ тӱшкенле 560 млн. салковой. СВО-ныҥ туружаачыларын ла олордыҥ билелерин jӧмӧӧрине ууландырылар.
Артканакча-манат jеҥилтелӱ эм-тусаларына, ӱредӱниҥ, культураныҥ ла jонjӱрӱмдик корулаар ууламjыныҥ тураларын чыныктаарына, ӧскӱс балдарды jадар тураларла jеткилдеерине ле кышка jылу берерине ууламjылалар.
Татьяна Гигельдиҥ угусканыла, бюджеттиҥ ӱзеери кирелтезин ӱлештирер сурак келер ээчий сессияда кӧрӱлер.
Онойдо ок jуунда республиканыҥ jылдык кирелтези 60 млн. салковойдоҥ ло иштеген улузы 5 кижидеҥ ашпай турган аргачыларга каландар jуурыныҥ jеҥилтилген автоматизированный системазын тузаланары jарадылган.
Ӱч балалу билелерге энелик капиталдыҥ республикан кеми кӧптӧгӧн лӧ тузаланар аргазы элбедилген. 2026 jылдыҥ чагаан айыныҥ баштапкы кӱнинеҥ ала энелик капитал ӱчинчи чыккан балага150 муҥ. салковой, тӧртинчи ле оныҥ кийнинде чыккан балдарга 100 муҥ салковойго кӧдӱрилер.
Мал-ашка азырал белетеер иште эки муҥнаҥ ажыра техника 170 муҥ гектарга jуук jердеҥ 152 муҥ тонна ӧлӧҥ-чӧп аларга кичеенет.
Јаҥы эл-тергеелик кайрал «За доблестный труд в Республике Алтай» – «Алтай Республикада jозокту ижи учун» деп медаль jӧптӧлӧри jарадылган. Ол республикада 15 jылдаҥ ажыра иштеп койгон башка-башка профессиялу ус улуска берилер.
