Кöк-бöрӱле jаан jеҥӱ

Алтай Республиканыҥ Кöк-бöрӱле jуунты командазы «Башкорт аты» деп адалган IV албатылар ортодо фестивальдаҥ jеҥӱлӱ jанган.

Спорттыҥ национал бӱдӱмдериле маргаандар Башкортостанда сыгын айдыҥ бажында ӧткӧн. Бистиҥ jуунты командага Шабалин, Оҥдой, Кан-Оозы ла Улаган аймактардыҥ спортчылары кирген.

Эл Курултайдыҥ председатели Эжер Ялбаков кӧдӱриҥилӱ туштажуда Кöк-бöрӱ – jалтанбастардыҥ спортты ла ӧмӧлик ойын болгонын темдектеп, депутат коллегаларыла кожо республиканыҥ командазын jӧмӧӧрине jаантайын белен болгонын угускан.

Кичӱизӱ айда «Алтай Республикада спорттыҥ национал бӱдӱмдери керегинде» jасак jарадалган. Jаҥы jасактыҥ тӧс амадузы – спорттыҥ национал бӱдӱмдерин бирлик ӱлекер-стандартка кийдирериле ӧзӱмине jаан аjару эдери.

Эл Курултайдыҥ туризм, аргачылык, спорт ло jашӧскӱрим аайынча комитеттиҥ jааны Сергей Тимошенский уткуулду сӧзинде «Бис, депутаттар, республиканыҥ бастыра эл-jоныла кожо слер учун «оорыганыс», соцсетьтердеҥ ойындарды улайын кӧргӧнис, абсолютный jеҥӱчил болуп jанып келереерге иженгенис», – деп угускан.