«Байлык Алтайдыҥ» ээчий алтамдары
«Байлык Алтай» деп адалган jонjӱрӱмдик ӱлекер су-кадыгы кирелӱ улусты jӧмӧӧрине ууламjылалган. Jаан учурлу ишти республиканыҥ Башкарузыныҥ, Эл Курултайыныҥ, «Единая Россия» партияныҥ ла «Манжерок» курорттыҥ jӧмӧлтӧзиле Кенектердиҥ текшироссиялык биригӱзи апарат.
Ӱлекер иштеп баштаган тӧрт jылдыҥ туркунына ӱч jӱске jуук кенектер олорго аҥылап келиштирген программа ла экскурсиялар ӧткӧн. Су-кадык ла jонjӱрӱмдик корулаш аайынча комитеттиҥ председатели Алёна Казанцеваныҥ jетиргениле, Людмила Яйтакованыҥ баштаган ижи jонjӱрӱмдик болуш jетирер уламjыда jаан мӧрлӱ болгонын jарт кӧргӱскен.
Быjылгы jылда ӱлекерле 70 кижи амыраган. Олордыҥ тоозында СВО-ныҥ туружаачыларыныҥ билелеринеҥ ле Кенектердиҥ текши россиялык биригӱзиниҥ баштамы ла аймак бӧлӱктериниҥ jаандары. Олор jаҥыс ла аҥылу турист орыктар ла культуралык программаларла танышкан эмес, бой-бойлорыла да таныжып наjылашкандар.
