Спикер тогузынчы сессияныҥ турулталары керегинде
Эл Курултайдыҥ председатели Эжер Ялбаковтыҥ jетиргениле, тогузынчы сессияда кӧп jаан учурлу сурактар кӧрӱлген, олордыҥ тоозында эҥ учурлузы – быjылгы ла келер эки jылдыҥ республикан бюджеттерине кубулталар кийдирери болгон.
2025 jылдыҥ бюджединиҥ кирелтези 2,2 млрд. салковойго кӧптӧгӧн, оныҥ 1 млрд. – бойыстыҥ кирелтелерис, а 1,2 млрд. – премьер-министр Михаил Мишустин республикала jол-jоругында берген jандырылбас болуш. Бу акчалар СВО-ныҥ туружаачыларын jӧмӧӧрине, ЖКХ учун тӧлӧмирлерине ле эм-томына jеҥилте, ӱредӱниҥ, культураныҥ ла спорттыҥ учреждениелерин тӧзӧмдӧрин чыныктаарына, jаткан туралардаҥ, кышкы одурышка белетенерине чыгарылар.
Эл Курултайдыҥ, Башкаруныҥ ла республикан прокуратураныҥ баштаҥкайлары ла кӧп балдарлу билелерди jӧмӧӧри керегинде jасакка кубулталар эдилген. Техникумдарда, колледжтерде ле ӱредӱликтиҥ республикан учреждениелеринде ӱренип турган балдары сургалдарында тӧлӱ jогынаҥ ла спорт тӧзӧмӧлдӧргӧ jеҥилтелӱ jӱргӱлеер. Ӧскӱс ле ада-энезинеҥ астыкан балдардыҥ jадар jерле jеткилделер табы элбедилер, олорго ӱзеери республикан тӧлӧмирлердиҥ сертификады берилер.
Сессияда онойдо ок «Алтай Республикада иштиҥ магыныҥ jурты» деп ат-нерекерегинде jасак jарадылган.
«Jеҥӱге jедерине jаан камаанын jетирген jурттарды аҥылап темдектеери Улу Jеҥӱниҥ 80 jылдыгына ла Тӧрӧлин коруучылардыҥ jылына учурлалган», – деп спикер jетирген.
Туризм ле колбулу «айылчылардыҥ туралары» керегинде пилотный ӱлекер jарадылган. Алтай Республика бу jаҥыртуда 18 субъекттиҥ тоозына кийдирилген. Агаш ууламjыныҥ кезик чыдуларын бӱдӱрерине республикан бюджеттеҥ чыгарылары jӧптӧлгӧн.
«Республиканыҥ башчызы Андрей Турчак «Таҥ Чолмон» орденле кайралдаганы – бистиҥ Народный программага ла эл-jонныҥ наказтарына тайанылган текши ижистиҥ турултазын керелейт. Мынаҥ да ары эл-jоныстыҥ jилбӱлери учун мынайда ла иштеерис», – деп спикер темдектеген.
