Эжер Ялбаков «Алтайдыҥ алыптары» деп ӱлекердиҥ jосокчызы

Алтай Республикада кадрлар белетеер «Алтайдыҥ алыптары» деп адалган талалык программазы иштеп баштады. Ӱлекердиҥ туружаачылары ла туштажу сыгын айдыҥ 1-кы кӱнинде ӧткӧн.

Ӱлекердиҥ талдаштарында jедимдӱ турушкан jуучылдар Горно-Алтайсктыҥ госуниверситединде ӱренерин баштап ийдилер.

Олордыҥ ортозында – эмчилер, ӱредӱчилер, аргачылар, jонныҥ jолчылары, Росгвардияныҥ ла полицияныҥ ишчилери. Текши тоозы 31 кижиниҥ кажызына ла башкаруныҥ председателиниҥ ордынчыларынаҥ, министрлердеҥ, талалык органдардыҥ jаандарынаҥ, муниципал тӧзӧлмӧлӧрдиҥ башчыларынаҥ jосокчылар-тазыктыраачылар талдалган.

Эл Курултайдыҥ спикери Эжер Ялбаковко кадрлар белетеер программа аайынча Наталья Вьюжанинала иштеери келишкен. Оныҥ айтканыла, «Алтайдыҥ алыптары» ӱлекерде тазыктыраачы болоры ого jаан некелте ле каруу. Наталья Вьюжанина – полицияныҥ капитаны, Кӧксуу-Оозы аймактыҥ МВД бӧлӱгинде миграциялык пункттыҥ башкараачызы. Талдама ижи учун ол «Јуучыл керектердиҥ туружаачызы» ле «Аҥылу айалгаларда черӱчил jозогы учун» деп темдектер ле кайралдаткан, эки бийик ӱредӱлӱ.

Бу программа Алтай Республиканыҥ ӧзӱмине jарамыкту бийик квалификациялу башкараачылар белетеери быжу, соҥында бу кадрлар иштерди некелтелӱ бӱдӱреринде алаҥзу jок.

Ӱлекердиҥ туружаачыларыныҥ тоозында Эл Курултайдыҥ депутаттары ла аҥылу операцияныҥ jуучылдары – Максим Анисимов, Александр Крючкин ле Алексей Лобанов.

«Бу ӱредӱ jуучылдарга депутат ижин jедимдӱ бӱдӱрерге jаан тӧзӧлгӧ болоры jарт», – деп Эжер Ялбаков темдектейт.